المتابعون

الثلاثاء، 17 يناير 2012

حكاية أبي المحابس الدبلوماسي وماجرى له في الطائرة الى عمان

الصورة تعبيرية ولا علاقة لها ببطل القصة

وصلت الحكاية على بريد الوكالة الخاص
كنت عائدا من بغداد الى عمان على الخطوط الجوية الاردنية .. وبعد مراحل متعددة من التفتيش الممل وصلت للطيارة والف الحمد لله كان نصيبي هو المقعد 14 B المخصص لي حسب (البوردينك كارت).. وبعد دقائق جاء شخص وبيده حقيبة بالعراق نسميها (دبلوماسية) وجلس بجانبي على رقم 14C .. كنت مشغولا بالنظر الى خارج الطيارة وبالتفكير في الحال العراقي البائس، فلم اسمعه يسلم علي، إلى أن قال لي وبانكليزية ركيكة: أنت مو عراقي ليش ما تجاوب على السلام ؟

بصراحة استحيت منه وقلت أحسن شي خلي يعتقد آني أجنبي لذلك ما فهمته.. فرديت عليه بالانكليزية (sorry)، خصوصا أن شكلي لايوحي بأني عراقي .

سكت واخذ يشد حزامه ويرتب جلسته، والشيء الذي جلب انتباهي هو عدد المحابس التي كان يلبسها بكلتا يديه، في كل يد خمسة محابس، وتذكرت الفتاح فال (أي قاريء الكف) الشيخلي اللي كان يفتر بشوارع بغداد ويقرا أيادي الناس بعشرة فلوس وكان يلبس بايده اربع او خمس محابس .
بعد شوية سمعته يصيح المضيفة ويقول: آني صايم وهذا اللي بصفي أجنبي كافر ويمكن يشرب مشروب، فإذا ممكن تشيليه منا وتوديه لغير مكان..! أجابته المضيفة: أستاذ آني ما اقدر أغير مكانه إذا تريد أنت تغير مكانك فاكو مكان فارغ بالأخير.

 لكن صاحبنا زعل وقال لها: شلون توديني للأخير آني دبلوماسي وعراقي شوفي جوازي..! جاوبت البنية بكل احترام: يا استاذ كل مسافر اله حقوقه عراقي مو عراقي ما دام دافع بطاقته. فقال صاحبنا ابو المحابس : اي بس اني صايم وسيد ما ممكن اقعد بصف واحد يشرب..! المضيفة تركته وما جاوبته، وبعدين أخونا التفت الي وقال بانكليزية ركيكة (ارجو ان تفهم باني مسلم وصائم حرام علي ان اقعد بصف واحد يشرب خمر).. فقلت له: نعم اني افهم صارلي مدة اشتغل بالعراق ولا تخاف اني ما اشرب.

فرح أبو المحابس جدا وبدأ يردد اللهم صلي على محمد وآل محمد عدة مرات، ثم بدأت الطيارة بالاقلاع ونام صاحبنا طول الطريق ووصلنا اخيرا عمان ونزلنا بمطار عالية وذهبنا لنأخذ حقائبنا. وشاء القدر ان اقف خلفه بمكان وصول الجنط وهو ما يشوفني، وبهالاثناء دق جرس تلفونه وأخذ يتكلم باللهجة العراقية ويقول:

- نعم حبيبتي هسه وصلت عمان.
- لا تخافين دبرت كل شيء، قلت لهم شخص يكرهنا وكتب هالشي باسمج.
- على كل حال المفتش نفسه يخاف مني ويعرف إذا أريد افصله بتلفون واحد فشلون يقدر يسوي شي ضدنا.. لا تخافين كل شي تمام.
- حبي اني مشتاقلج .................... (كلام ساقط نعتذر عن ذكره)
- اوصل العصر عندج
- لا الف مرة قلت لك زوجتي ما تعرف، وحتى لو تعرف اقول هاي بس تشتغل عندي .
- قلت لك كل شي انتهى بالوزارة رتبتها واقتنعوا.
- زين حبيبتي جتي الجنط اخابرج من الاوتيل بعدين..

وعندما أغلق التلفون تقربت منه وقلت له بالعربي: سيدنا اشوف قبل شويه كنت صايم وما تقعد بصف واحد يشرب، وهسه تحجي مفشك وجمالة ويه وحدة مو مرتك؟ اصفر وجه أخونا ابو المحابس وقال: يا خوي العراقيين تره كلهم عايشين بالكلاوات.. خلينا نعيش خويه.

تلقفت حقيبتي وأنا اقول في نفسي: لو جنت كلاوجي لابس كم محبس هسه كان ملحق بدولة اوربية..!

هناك تعليق واحد:

لبيب العراقي يقول...

بس تره الرجال مبين دبلوماسي أكشر...شوف شلون كلام ينكط ديبلوماسيه من تكلم مع عشيقته...و للاخ العراقي الي يشبه الاجنبي أقول: و لو تضيف لقب يخليك سيًد و ما تلبس رباط...ممكن يعينوك وزير