المتابعون

الأحد، 2 نوفمبر، 2014

عندما غص أبو فليح بالضحك

المصدرهدد قائد القوة البحرية في الحرس الثوري الإيراني، الأدميرال علي فدوي، بـ"تدمير الأسطول الأميركي في مياه الخليج العربي إن لم يغادر المنطقة".

وفي حوار مع وكالة أنباء "فارس" التابعة للحرس الثوري، أكد فدوي أن "إخراج الأميركيين من الخليج من المهام الأساسية للحرس الثوري الإيراني، وإن قواته قادرة على تدمير وإغراق الأسطول الأميركي خلال 50 ثانية".

وقال فدوي الذي يقود وحدة حراسة مياه الخليج ومضيق هرمز إن قواته "أجرت تدريبات عديدة لمواجهة الأسطول الأميركي"، وإنها تراقب "تحرك الأسطول الأميركي الخامس في البحرين ومياه الخليج".

وأضاف: "رغم أن الأميركيين يلتزمون بحدود تحركهم ضمن المياه الدولية لكننا نرصد تحركاتهم عن طريق أجهزة الرادار، وبوارجنا تتحرك بأمتار بموازاة الأسطول الأميركي للرد على أي تحرك معاد".

وكان الأدميرال فدوي قد قال في وقت سابق إن "أميركا هي الدولة الأكثر حرصا في الخليج كي لا يتم إطلاق حتى رصاصة واحدة في هذه المنطقة، لأن جميع مصالحها ستتعرض حينها للخطر".

بعد ما خلصنا قراءة الخبر أنفجر أبو فليح شغيدل بالضحك و لم يتوقف الا بعد ربع ساعة... و بعد أن أكمل ضحكته جر صلوات حوالي الخمس دقائق و أنطا لكل واحد منا بوسة و هو يقول " بارك الله بيكم وليداتي ...تره كلش حلومن الواحد يسمع نكات حلوة كلًش من الصبح ".....غريبة أبو فليح هذا...فنحن لم نكن نلقي نكات إنما كنا نقرأ الأخبار فقط

الاثنين، 6 أكتوبر، 2014

انفاق و معجزات

المصدر حذرت مصادر عسكرية عراقية من وجود أنفاق تحت مقرات ألوية ووحدات الجيش العراق، تعود لتنظيم "الدولة الإسلامية"، الذي يعتمد أسلوباً جديداً في هجماته ضد تجمعات الجيش أهمها حفر الأنفاق.

وقال مصدر عسكري ضمن قوات العمليات الخاصة المتمركزة في محافظة الأنبار، إن قوة أمنية لاحظت دخول عناصر من "داعش" إلى مقر اللواء الثامن المحصن والمحاط بأسوار كونكريتية عالية في الرمادي.

ابو فليح شغيدل كعد يجر صلوات يمكن نص ساعة...سألنا شبيك ؟ جاوب و الدمع يترقرق في مقلتيه و قال : صدك أحنا دا نعيش بزمن المعجزات...الهم صلي على محمد و  اااااااااااااال محمد...و أجهش بالبكاء حتى أبتلت دشداشته و أنترست أستكانات الشاي دمع

يمعود شبيك عمي أبو فليح...شنو قصتك اليوم

فأجاب و لا زال الدمع يترقرق في مقلتيه قائلا...يعني العراق كله دا يعاني من شحة الكهرباء و أنفاق داعش ما شاء الله كلها منورة كهرباء و تهوية و ألا كان أختنقوا الدواعش داخل هذه الأنفاق....لو هاي معجزه ربانيه و لازم نجر صلوات عليها...لو الجماعة مجطلين على بيوت جماعة المنطقة الخضراء و الجماعة ما يدرون...خطية

و أستمر بكاء أبو فليح بينما استمر استغرابنا هل يبكي أبو فليح على أننا نعيش زمن المعجزات...ام تعاطفا مع حرامية المنطقة الخضراء...أم على حظنا المصخم اللي خلانا نعيش هيجي زمن أغبر

ملاحظة : و لا زال لغز المعدات التي أستخدمتها داعش في حفر هذه الأنفاق قائما...مثل لغز بناء أهرامات الفراعنة و الجنائن المعلقة وعملية بواسير خالد العطية...جروا صلوات



السبت، 27 سبتمبر، 2014

طك الأصابع بفلس

أم ستوري الداية جائت تسألنا و هي تلهث...انتو مو تكولون أن الصورة بألف كلمة
قلنا للست أم ستوري ...إي نعم
قالت دشوفوا هاي الصورة مال وزير دفاع أوباما و هو يطك أصبعتين...فرحان أنه أمريكا اللي خرجت من الباب قد رجعت من شباك داعش...بس المكموع منو علمه يطك أصبعتين ؟

و قبل أن نقول لأم ستوري أنه هاي مو طك أصابع و نحييها في الوقت نفسه على حكمتها التي باتت تخر من آذانها أنطلقت مسرعه و هي تقول...راح أروح أشوُف الصورة لنشمية الخبازه...بلكت تعرف منو اللي علًم هالمكموع طك أصبعتين

خالة أم ستوري...الكل صارت تطك أصبعتين ...ترة بس المواطن العراقي صار الطك على راسه

الصورة اللي كانت بأيد أم ستوري


يا ريتنا كنا هنود

  تمكن المسبار الهندي " كوماري مو عيراق " من الوصول الى المريخ و بنجاح . و قال مدير المشروع كومار أبن أم كومار لمراسلنا محمود دعبل " باباجي...وقع نبأ وصول المسبار بنجاح الى المريخ كان مثل البهارات على قلبي " و أردف قائلا " و بهاي صرنا أول دوله آسيويه تصل للمريخ منذ المحاوله الأولى و أول أمه بالعالم تصل الى هناك بتكاليف لم تتجاوز السبعين مليون دولار و اللي هي يمكن كلفه واحد عضو من أعضاء برلمان كوماري عيراق بالشهر و اللي ما يسوي شئ غير بس يكعد و يلعب بخشمه " ...و بعدين لزم مراسلنا محمود دعبل من ياخته و سأله قائلا.... هم بعدكم تضحكون على الهنود ؟

صدك و الله...هم بعد يحق لنا أن نقول " قابل آني هندي "...و تتبغدد علينا...و أحنا من بغدااااااد





السبت، 13 سبتمبر، 2014

عفية جدو

جدو.. جدو...يقولون الأمريكان و ربعنا سووه طشار داعش ما أله والي

الجد: شنهي...منو

جدو داعش...ما سمعت بيهم

الجد: لا و الله...و هذوله شنهي

جدو هذولة منظمة أرهابية أحتلت نصف العراق الشمالي و كعدوا على 
قلب المالكي الى أن أجو الأمريكان و كاموا يقصفون بيهم

الجد : زين هذولة منين أجو

جدو من وراء الحدود

الجد : آنه خوك...قبل ما كان واحد يكدر يفوت الحدود ...إيران بقت 8 سنين و بعدين 
ماكو واحد إيراني بقى بحدودنا...شنهي اللي صار

جدو هاي كلها من وره التمويل الخارجي

الجد: خايب شنو هالكلام...المفروض آني اللي كبرت و خرُفت مو أنت
جدو هاي مو خرافات

الجد : عوفنا من هاي اللي شسمها راعش ...من أجيتني تهوس عبالي صلحوا الكهرباء...شوكت راح يصلحوها

جدو يقولون فد كم سنه اللخ

الجد : صار لهم سنين على نفس القوانه...و الماي؟

جدو يقولون أغلي الماي و كلشي يكعد تمام

الجد : ولك خايب أغلي الماي يعني جيب غاز...و غاز يعني سره..و سره يعني قهر

جدو قابل أنت اللي لازم السرة...أشو كلها براسي...و الكهرباء من تنقطع أكعد أهفيلك...يعني هم براسي...و الماي يوميا أغلي إلك...يعني هم براسي

الجد و هو يهم برفع نعاله ليطيح به أبن أبنه : و لك خايب لمن كل هالمصايب براسك جاي فرحان و تهوس على شنو

الحفيد و هو يبتعد محاولا تفادي نعال الجد : جدو صوجي آني اللي أجي و أحجيلك

الجد  وهو يهم بأخراج لفافة السيجاير يهمهم و يقول : شلون جيل تعبان ما يعرف مصلحته وين...يقشمروهم براعش من صفحه و ينهبون البلد و يدمروه من صفحة اللخ

زين أذا مات جدو شراح نسوي ؟؟؟؟


الأحد، 7 سبتمبر، 2014

منو طلع الهندي ؟

المصدر : وجهت وزارة الدفاع الهندية ضربة قاصمة إلى جهود شركة «هندوستان إيورونتكس ليمتد» الحكومية العقيمة الممتدة على مدى 14 سنة لتصميم طائرة «إنترميديت جيت ترينر».
وقال وزير الدفاع الهندي آرون جايتلي: «شركة هندوستان التي عكفت على تطوير طائرات «آي جي تي» لم تستطع حتى الآن حسم قضايا تتعلق بجناح   الطائرة وهيكلها». وأضاف أنه «لمواجهة الظرف الطارئ المتأتي من التأخير الطويل جداً، بدأت الهند بالبحث عن بدائل للطائرة جي آي تي
و عندها أوضح مراسلنا محمود دعبل للسيد الوزير بأن إيران تقول أنها أنتجت طائرات نفاثة بخبرة محلية و هاليوم دينتجون طائرات بدون طيار و صواريخ عابرة للقارات و غيرها فكيف لا تستطيع الهند و هي التي لديها معامل لتجميع طائرات الميج 29 أن تنتج طائرة واحدة فرد الوزير الهندي و قال " أبني محمود...أنت ليش يصير هندي...إيران تنتج طائرات بأفلام هندية...أحنا يريد ينتج طائرات من صدك ...أوضًح أكثر لو وصلت "

...لا يابة وصلت


أستنساخ عن أستنساخ يفرق

المصدر : طمأنت الولايات المتحدة حلفاءها بأن التحالف الدولي الذي تقوده ضد تنظيم داعش لن يستنسخ النموذج الذي قاده الرئيس السابق جورج بوش ضد النظام العراقي عام  2003

وأعلنت الناطقة باسم وزارة الخارجية الأميركية ماري هارف أن الائتلاف الدولي الذي تحاول واشنطن تشكيله ضد «داعش» لا يمت بأي صلة إلى التحالف الذي قادته لاجتياح العراق عام 2003، والذي تعرض لانتقادات شديدة

و في ردها على سؤال مراسلنا سوادي أبو تنكة حول معنى كلامها عن أستنساخ التجارب  قالت الناطقة له و بصريح العبارة " يعني أخاف عبالكم راح نطير اللي كاعدين على قلوبكم أمثال المالكي و العبادي و الحكيم و الصدر و غيرهم مثلما طيرنا صدام و القذافي و غيرهم فأنتوا غلطانين...أمسحوا أيدكم بالكاع...و أنسوا ".....بعدين طلعت و صفقت الباب ورائها....شلون صفاقة